طعمية في بنك الطعام ... كان يوم تححححححفة

بصوا بقى .. هاحكيلكم الحكاية من الاول خاااااااالص ..

و هاقول على كووووووول اللي حصل معانا في المغامرة دي

انا من اول شهر 7 كده و انا عمالة ازن على اخواتي ان حد يروح معايا بنك الطعام ..

و كل يوم اصحى الصبح اقول لهم .. اللي تقول لي انا خارجة .. و اللي مكسلة .. و اللي تبص في السقف و تصفر و لا كأنها سمعتني ..

و كل يوم كده .. لحد ما يأست و فقدت الامل ..

جيت بقى النهاردة .. صحيت الصبح .. و بقول لاخواتي ... لقيت واحدة بتقول لي ماشي

بجد ماكنتش مصدقة ( حسيت ان النهاردة عيد ) .... انا طبعا ما صدقت و رحت لبست ..

و كمان شوية لقيت اختي التانية بتقول لي : انا بفكر اجي ( النهاردة عيد بجد )
بس في الاخر قالت لنا خلاص روحوا انتوا انا مش جاية ( رجعت لاصلها )

التانية بقى كل ما اقول لها يلا .. تقول لي استني شوية .. قعدت ساعة و ثلث بتجهز و جات صاحبتها اتصلت ... ده اللي كان ناقصنا ربع و لا نص ساعة بتتكلم .. و انا هاطأ

المهم بعد ما جهزت و خلاص كله تمام ... بابا قال لنا انا هاوديكوا ... (كتر خيرك يا بابا )

المهم بابا نزل قبلنا .. و بعدين لما نزلنا لقيناه بيقول لنا العجلة نايمة

فقلنا خلاص هانروح بالمواصلات .. و اختي ماكنتش موافقة في الاول بس اقنعتها

و مشينا لاول عباس عشان نركب من عنده ..

طبعا الشمس كانت جميييلة كنت حاسة اني بتحمص و انا ماشية .. هاوصل سايحة

فضلنا واقفين عند اول عباس مستنيين اي حاجة رايحة لنادي السكة ..

و اخيييييييرا جه الميكروباظ

و ركبنا .. نزلنا عند نادي السكة .. و مستنيين اي ميكروباظ داخل يمين من عند نادي السكة .. و زي ما قلت الشمس كانت تحفة و طيبة اوي

بعدين جه الميكروباظ و ركبنا .. نزلنا عند اوليمبيك .. و مشينا شوية .. لحد ما وصلنا .. لقينا الباب الاول مقفول .. اختي كانت هاتاكلني ... قلت لها نمشي شوية قدام .. و الحمدلله لقينا الباب التاني مفتوح

و دخلنا .. اول ما دخلنا في واحد سالنا .. انتوا جيتوا قبل كده ؟؟

انا جيت قبل كده .. بس كان من رمضان اللي فات

فقلت له اه انا جيت بس هي لا .. و لسه جاية اكمل و اقول له اني جيت من زمااااااان .. لقيته راح واخدها و قايل لها تعالي عشان نعمل لك استمارة ... فانا سكتت

و ابتدينا نعبي الحاجات في الصناديق ...

و بعدين حسينا بالزحمة في الحتة اللي احنا فيها .. فجت بنت قالت لنا نروح على ترابيزة تانية عشان هم هناك تعبوا و هايروحوا ... فقلنا خلاص نروح مكانهم ..

روحنا و قعدنا نعبي .. اختي مسكت الزيت و الصلصة و انا مسكت الشاي و الملح و الفاصولياء ( حاجات مالهاش دعوة ببعضها اصلا هههههههههه )

و اختي كل شوية ييجي حظها في علبة صلصة مفتوحة و بايظة ههههههههههه

و كل شوية تقعد تقول لي انا قرفاانة من اللي بمسكه ده .. هههههههه و انا اقول لها .. طب نبدل ؟؟

تقول لي لا ياختي خليني هنا احسن ههههههههه

و انا كل شوية ييجي حظي في كيس ملح مفتوح .. و يغرق الدنيا .. و كمان انا كنت لابسة اسود ... بس الحمدلله .. اتحول لابيض

و بعدين العصر أذن .. و روحنا صلينا ..

و كانوا كل شوية يقولوا : كفاية كده يا جماعة .. هناخد بريك

و اقعد انا و اختي نتكلم و نضحك في البريك .. و احنا واخدين جنب كده .. و الناس كانت بتبص لنا بطريقة غريييييييييبة عشان اختي كانت كل شوية تقول حاجة و نفطس احنا الاثنين من الضحك ..


و بعدين قعدت تقول لي ... لما الساعة تيجي 6 و نص هانمشي .. و انا ماكنتش عايزة امشي

بعدين لما جات 6 و نص .. قعدت اتحايل عليها شوية قالت لي خلاص 7 هانمشي .. جات 7 .. قالت لي : ها .. نمشي بقى و لا ايه ؟؟

قلت لها اللي انتي عايزاه .. قالت لي خلاص نقعد لحد 7 و نص

جات 7 و نص و كان لازم نروح بقى .. فلما جينا نروح .... خرجنا منه و عدينا الشارع .. على امل ان احنا نلاقي حاجة نركبها و ننزل عند نادي السكة ... بس مالقيناش .. فقالت لي خلاص نمشيها

انا طبعا تنحت .. لان المسافة كبيرة .. بس لان احنا لازم نروح .. و مافيش حاجة نركبها .. فمشيناها ..

وصلنا لنادي السكة .. المفروض بقى نروح عند السلم .. عشان نركب حاجة تنزلنا اول عباس

مشييييينا للسلم و كنا خلاااااص اتدمرنا

و مالقيناش حاجة نركبها لاول عباس ( ده اللي كان ناقص )... فضلنا واقفين شوية لحد ما جه الفرج ..

و لقينا ميكروباظ ركبناه .. و نزلنا عند اول عباس ..

ومشيييييييييييي ينا تاني من اول عباس للبيت

انا بقى اول ما دخلت .. ماكنتش شايفة قدامي غير ازازة المية اللي في الثلاجة ..

دخلت المطبخ و شربت ازازتين لوحدي

و اختي بقى قعدت تقول لي .. ابقي قابليني لو اتخبطت في عقلي و رحت معاكي تاني

كمان سنتين كده على ما اكون عوضت اللي خسيته

...... بس كده ...

انا بقى بحكيلكم ع اللي حصل ... لاني حاسة انها مش هاتككر تاني

ادعوووووووووولي يا رب اقدر اروح تاني

و بجد يا جماعة كل اللي ماراحوش .. لاااازم تروحوا .. و الله هاتتبسطوا اوي .. ده غير كمية الحسنات اللي هاتاخدوها

انا مستعده اروح معاكى
اهه نكسب فيكى ثواب
يالا كله على الله
ما حدش واخد منها حاجه